Teitur Örn markahæstur í frumrauninni

Teitur Örn Einarsson var markahæstur í fyrsta leik sínum með þýska liðinu Flensburg í kvöld en hann gekk til liðs við félagið í byrjun vikunnar. Hann skoraði fimm mörk í sex skotum gegn Veszprém í kvöld i 28:23 tapi Flensburg í Meistaradeild Evrópu í handknattleik. Leikið var í Ungverjalandi.

Þrátt fyrir tap í leiknum er óhætt að segja að Teitur Örn geti verið ánægður með sinn hlut í leiknum enda ekkert auðvelt að þreyta frumraun sína á jafn erfiðum útivelli og er hjá Veszprém en uppselt var á leikinn, 5.000 áhorfendur.

Roland Eradze og liðið sem hann vinnur fyrir, Motor, vann Dinamo Búkarest, 28:27, í Úkraínu. Liðin eru í B-riðli eins og Flensburg og Veszprém.