Svíinn Robert Hedin verður ekki eftirmaður Guðmundar Þórðar Guðmundssonar í stól þjálfara þýska liðsins MT Melsungen. Hendin staðfesti í samtali við Handbollskanalen í Svíþjóð að hann hafi fengið tilboð frá forráðamönnum þýska liðsins en afþakkað. Það henti honum ekki m.a. af persónulega ástæðum að taka við starfi í Þýskalandi um þessar mundir.
Hedin er þjálfari bandaríska karlalandsliðsins og norska úrvalsdeildarliðsins Nøtterøy. Hann segist vera upp með sér yfir að hafa verið sýndur áhugi en því miður þá standi ekki vel á hjá sér um þessar mundir. Þar af leiðandi eigi hann örðugt um vik að söðla um.
Hendin þjálfaði hjá Melsungen frá 2007 til 2009. Í gegnum tíðina hefur hann m.a. þjálfað uS N-Lübbecke, Ystads IF, Aalborg Håndbold, Bregenz Handball og norska landsliðið.
