- Auglýsing -
Hornamaðurinn Birgir Már Birgisson hefur framlengt samning sinn við handknattleiksdeild FH til næstu tveggja ára. Birgir Már kom til FH fyrir fjórum árum frá Víkingi og hefur síðan fest sig í sessi í Kaplakrika. Hann hefur skorað 49 mörk í 13 leikjum í Olísdeildinni á keppnistímabilinu sem nú stendur yfir en FH er í efsta sæti deildarinnar.
„Þetta eru miklar gleðifréttir fyrir okkur FH-inga enda hefur Birgir Már verið einn allra besti hornamaður landsins undanfarin ár og í raun allt frá því hann kom til okkar FH-inga sumarið 2018,“ er haft eftir Ásgeiri Jónssyni, formanni handknattleiksdeildar FH í tilkynningu frá deildinni.
„Birgir Már er drengur góður og virkilega öflugur leikmaður á öllum hliðum leiksins. Gríðarlega öflugur varnar- og sóknarlega sem og frábær hraðaupphlaupsmaður,“ sagði Ásgeir ennfremur í tilkynningunni.
Til stendur að FH mæti HK á næsta mánudag í fyrsta leik liðanna í Olísdeildinni á þessu ári.
- Auglýsing -
