„Síðasti aðgöngumiðinn er seldur. Það er uppselt,“ sagði Jón Halldórsson stjórnarmaður í handknattleiksdeild Vals glaður í bragði í samtali við handbolta.is fyrir stundu þegar staðfest var að síðasti aðgöngumiðinn á viðureign Vals og Flensburg-Handewitt í Evrópudeild karla í handknattleik hafi runnið út úr miðasölukerfi tix.is Leikurinn fer fram í Origohöll Valsmanna við Hlíðarenda á þriðjudagskvöldið næsta og hefst klukkan 19.45.
„Þetta er frábært. Nú er það okkar að standa eins vel að leiknum og kostur er á og hafa umgjörðina sem glæsilegasta,“ sagði Jón.
Vel á annað þúsund áhorfendur verða á viðureigninni en fyrir henni ríkir mikil eftirvænting, ekki síst í ljósi frábærrar byrjunar Valsliðsins í keppninni. Valur er efstur í riðlinum eftir tvær umferðir eins og Flensburgliðið sem skartar mörgum þekktum handknattleiksmönnum, m.a. landsliðsmanninum Teiti Erni Einarssyni.
Lífleg sala á næsta heimaleik
Eftir leikinn við Flensburg taka við tvær viðureignir hjá Valsmönnum á útivelli, gegn FTC og PAUC, áður en sænska meistaraliðið Ystads IF HF kemur í heimsókn 13. desember í Origohöllina. Miðasala á leikinn við Ystad er þegar hafin og hefur verið afar lífleg á miðasöluvef tix.is.
