Thea leyst undan samningi og er á heimleið

Landsliðskonan í handknattleik, Thea Imani Sturludóttir, hefur verið leyst undan samningi við danska úrvalsdeildarliðið Århus United eftir aðeins hálft ár hjá félaginu. Thea mun vera á leið til Íslands þar sem hún ætlar að byggja sig upp á nýtt eftir að hafa glímt við meiðsli í öxl og síðar í hné allt þetta tímabil.

Frá þessu er greint á Facebook-síðu Árósarliðsins í kvöld. Þar segir að stjórnendur félagsins séu miður sín yfir því að Thea hafi ekki náð sér á flug hjá liði félagsins. Thea, sem er 23 ára gömul, flutti til Árósarliðsins í sumar sem leið eftir veru hjá Oppsal í norsku úrvalsdeildinni og þar á undan í herbúðum Volda í næst efstu deild sem er undir stjórn Halldórs Stefáns Haraldssonar fyrrverandi þjálfar Theu hjá Fylki.

Haft er eftir Theu í yfirlýsingu Århus United að hún ætli sér heim til Íslands þar sem hún stefnir á að stokka spilin og ná sér góðri af meiðslum sem hafa plagað hana síðustu mánuði og slegið hana út af laginu á handboltavellinum.