„Við verðum að venjast því að það verður umtal, pressa og væntingar til okkar. Það er líka eitthvað sem við viljum,“ sagði Sigursteinn Arndal þjálfari FH ánægður með sína menn eftir sigur á Aftureldingu, 30:28, í fyrsta leik liðsins í Olísdeild karla á nýju tímabili í Kaplakrika í kvöld.
Aftureldingarmenn saumuðu að FH-ingum undir lokin og fengu þrjú tækifæri til þess að minnka muninn í eitt mark. FH-liðið stóðst álagið fyrir framan vel á annað þúsund áhorfendur, flestir þeirra FH-ingar, sem ætluðust til þess að Aron Pálmarsson og samherjar ynnu fyrsta heimaleikinn.
„Þetta er aðstæður sem við viljum að takast á við og gerum það glaðir,“ sagði Sigursteinn sem var ánægður með leik sinna manna, ekki síst í fyrri hluta leiksins.
„Við náðum góðum tökum á leiknum á fyrstu 10 mínútum en töpuðum aðeins þræðinum þegar á leið hálfleikinn. Frumkvæðinu náðum við aftur þegar við breyttum yfir í 5/1 vörn.
Megum ekki vera hrokafullir
Við megum nú heldur ekki gleyma því að við vorum að leika við frábært Aftureldingarlið sem náði mjög góðum árangri í fyrra og hefur heldur styrkst í sumar. Við megum ekki falla í þá gryfju að vera hrokafullir og halda að við eigum að ganga yfir allt og alla,“ sagði Sigursteinn sem lauk miklu lofsorði á félagsmenn FH fyrir að skapa þá frábæru umgjörð sem var á leiknum í kvöld og um leið römmuðu áhorfendur leikinn inn með því að fjölmenna.
Næsti leikur FH verður við Val í Origohöllinni á mánudagskvöldið.
Nánar er rætt við Sigurstein hér fyrir neðan. Hlusta má að viðtalið í heild með því að smella á örina.
