- Auglýsing -

Þetta kallast toppurinn

Vignir Stefánsson og Alexander Örn Júlíusson glaðbeittir með Íslandsbikarinn eftir sigur á Íslandsmótinu á síðasta ári. Mynd/Björgvin Franz

„Þetta er það sem maður kallar toppinn,“ sagði glaðbeittur Vignir Stefánsson, hornamaður Íslandsmeistara Vals, í samtali við handbolta.is í kvöld eftir að hann hafði tekið við Íslandsbikarnum með samherjum sínum eftir annan sigur þeirra á deildarmeisturum Hauka í Schenkerhöllinni á Ásvöllum í kvöld. Vignir var einnig í Íslandsmeistaraliði Vals fyrir fjórum árum.


„Við vorum hreinlega geggjaðir, það er ekkert flóknara. Við vorum lengi að slípa okkur saman en það tókst. Okkur tókst að þjappa okkur mjög vel saman fyrir og á meðan úrslitakeppnin stóð yfir. Það gaf okkur helling og þjappaði hópnum vel saman og var hann þó góður fyrir þótt einhver hafi haldið öðru fram. Það má sjá hvernig við enduðum tímabilið,“ sagði Vignir sem var einn þeirra sem fór á kostum í Valsliðinu í kvöld og skoraði sjö mörk.


Vignir sagði að skilaboðin hafi verið skýr fyrir síðari leikinn í kvöld, halda áfram þar sem frá var horfið á þriðjudaginn. „Við bara byrjuðum af krafti og lukum tímabilinu frábærlega. Í úrslitakeppninni lékum við sex flotta leiki,“ sagði Vignir Stefánsson, leikmaður Vals skiljanlega glaður í bragði.

- Auglýsing -
- Auglýsing -

Nýjustu fréttir

- Auglýsing -