„Ég er búinn að vera glíma við vandamál undir löppinni. Þetta er búið að versna með árunum og núna er kominn sá tímapunktur að ég þarf að vinna í mínum meiðslum og það þarf að ná þessu á rétt ról,“ segir Stefán Rafn Sigurmannsson, handknattleiksmaður í samtali við Vísi/Stöð2 í kvöld en í dag var tilkynnt að samkomulag hafi tekist milli hans og ungverska liðsins Pick Szeged um starfslok.
Stefán Rafn hefur ekkert leikið með Pick Szeged á þessari leiktíð vegna iljarfellsbólgu sem hefur hrjáð um langt skeið. Hér má fræðast nánar um iljarfellsbólgu.
„Þetta var besta lendingin og sú sem ég sóttist eftir,” segir Stefán Rafn í fyrrgreindu viðtali um samningslitin sem tilkynnt var um í dag. Hann fór í aðgerð vegna iljarfellsbólgunnar á dögunum og er byrjaður í endurhæfingu hjá Elís Þór Rafnssyni, sjúkraþjálfara.
Ef Stefán Rafn tekur upp þráðinn í handknattleik hér á landi segir hann aðeins eitt lið koma til greina, uppeldisfélagið, Hauka.
