Teitur Örn Einarsson handknattleiksmaður hjá þýska liðinu Flensburg-Handewitt vonast til þess að leika með liðinu á ný á laugardaginn þegar Flensburg tekur á móti Eisenach á heimavelli í þýsku 1. deildinni. Eins og handbolti.is sagði frá í gær fékk Teitur Örn þungt högg á annað augað undir lok viðureignar Flensburg og Kadetten Schaffhasuen í Evrópudeildinni í handknattleik á síðasta þriðjudag.
Teitur Örn frá keppni – fékk þungt högg á auga
„Þetta var þungt högg en þetta er allt að jafna sig. Vonandi verða bara nokkrir dagar í viðbót,“ sagði Teitur í dag við handbolta.is. Hann fór ekki með samherjum sínum til Svartfjallalands þar sem þeirra bíður leikur við HC Lovcen-Cetinje í annarri umferð Evrópudeildarinnar á morgun, þriðjudag.
„Stefnan er sett á það að vera með í næsta leik í deildinni sem verður seinasti leikur Flensburg fyrir landsliðsvikuna,“ sagði Teitur Örn sem horfir bjartsýnn fram á veginn.
Tveir frábærir leikir í röð
Teitur hafði átt tvo frábæra leiki í röð með Flensburg þegar hann var sleginn út undir lok viðureignarinnar við Kadetten Schaffhausen. M.a. var búinn að skora 14 mörk í tveimur leikjum og flest með þrumufleygum eins og þeim sem sjá má á myndskeiðinu hér fyrir neðan.
🚀🎯😲 pic.twitter.com/MEgNJrGmKv
— HandNews (@HandNewsfr) October 11, 2023
