Þórey Rósa Stefánsdóttir landsliðskona í handknattleik var í dag valin íþróttamaður Fram fyrir árið 2023.
Þórey Rósa er og hefur verið hluti af meistaraflokki Fram í handbolta í nokkur ár eftir að hún flutti heim 2017 eftir átta ár með félagsliðum í Hollandi, Þýskalandi, Danmörku og í Noregi og hefur átt sinn þátt í að vinna marga titla fyrir Fram á undanförnum árum. Þórey hefur leikið nálægt 300 leiki með meistaraflokki Fram og líklega skorað í þeim um eða yfir 1.000 mörk en fyrsti leikur Þóreyjar Rósu með meistaraflokki Fram var árið 2005.
Þórey Rósa lék með landsliði Íslands á HM fyrr í þessum mánuði en hún var einnig með landsliði Íslands á HM í Brasilíu árið 2011. Það verður að teljast glæsilegt að vera á þeim stað í sinni íþrótt að hafa verið í 12 ár fastamaður í landsliði. Þórey Rósa hefur leikið 134 landsleiki og skorað 384 mörk.
„Þórey Rósa er einstakur félagi og keppnismaður, það er sönn ánægja og heiður fyrir Fram að þessi ótrúlega íþróttakona sé leikmaður félagsins og hafi verið það í svo langan tíma,“ segir m.a. í tilkynningu frá Fram.
