Handknattleiksdeild Víkings hefur gert tveggja ára samning við Þorfinn Mána Björnsson. Hann kemur til Víkinga frá uppeldisfélagi sínu, Haukum.
Þorfinnur hefur undanfarin þrjú tímabil leikið í meistaraflokki hjá Haukum, látið mikið fyrir sér fara í ungmennaliði félagsins í Grill 66-deildinni auk þess að hafa verið í æfingahópum yngri landsliða Íslands.
Tækifæri felast í skiptunum
„Ég tel að það felist mikil tækifæri fyrir mig að skipta úr uppeldisfélaginu mínu og yfir í Víking. Mér líst afar vel á hópinn, þjálfara og aðstaðan er til fyrirmyndar. Það vóg einna þyngst í ákvörðun minni að velja Víking sem mitt næsta skref á ferlinum. Ég er mjög spenntur að vinna með strákunum að gera vel í Olísdeildinni í vetur og hlakka til komandi tíma. Áfram Víkingur,“ er haft eftir Þorfinni Mána í tilkynningu handknattleiksdeildar Víkings í morgun.
Frábær viðbót
„Þorfinnur er frábær viðbót í leikmannahópinn okkar og erum við spennt að sjá hann blómstra í Víkingsbúningnum á komandi tímabili,“ láta Víkingar hafa eftir sér í sömu tilkynningu.
Þorfinnur Máni er að minnsta kosti sjöundi leikmaður Hauka sem annað hvort hefur skipt um lið í sumar eða lagt skóna á hilluna.
