Þórir Hergeirsson og norska landsliðið fór afar vel af stað á fjögurra liða æfingamóti í Horsens í Danmörku í gær, Golden league, sem er upphitunarmót fyrir EM sem fram fer í Danmörku og í Noregi í desember.
Norska landsliðið tók það danska í kennslustund í gær, 28:21, eftir að hafa verið átta mörkum yfir að loknum fyrri hálfleik, 16:8.
Evrópumeistarar Frakka fóru illa með landslið Svartfellinga á sama móti, lokatölur 29:13, eftir að verið 15:6, yfir þegar leiktíminn var hálfnaður. Svartfellingar virðast eiga erfitt uppdráttar um þessar mundir og kynslóðskipti að eiga sér stað í landsliðinu sem hefur árum saman verið í fremstu röð í Evrópu.
Mótinu verður framhaldið á morgun og á sunnudaginn.
Fleiri vináttuleikir landsliða kvenna fóru fram í gærkvöld. Svíþjóð lagði Pólland, 21:19, og Þýskaland vann heimsmeistara Hollendinga, 27:25. Sterka leikmenn vantaði í hollenska landsliðið en tveir úr sigurliðinu á HM í fyrra eru með slitið krossband um þessar mundir og fleiri kenna sér meiðsla.
