Þór Akureyri hefur fengið hornamanninn Jóhann Geir Sævarsson að láni frá KA út keppnistímabillið. Jóhann Geir verður gjaldgengur með Þórsurum í kvöld þegar þeir taka á móti ungmennaliði Selfoss í Höllinni á Akureyri í Grill66-deildinni í handknattleik.
Í tilkynningu á Facebooksíðu Þórs segir að Jóhann Geir sé öllum hnútum kunngur í Þorpinu eftir að hafa leikið upp alla yngri flokka Þórs. Hann hefur ekki verið áberandi með KA-liðinu á keppnistímabilinu.
Halldór mættur til leiks
Ekki er nóg með að Jóhann Geir sé kominn í slaginn með Þór heldur mun Halldór Kristinn Harðarson hafa dregið fram skóna og hyggst leggjast á árarnar með liðinu. Þykir það sæta nokkrum tíðindum að Halldór Kristinn hafi snúið til baka en hann hefur æft um skeið með Þórsliðinu.
Í gær var gengið frá ráðningu bræðranna Geir Kristins og Sigurpáls Árna í starf þjálfara Þórsliðsins. Þeir stýra ekki liðinu gegn Selfossi í Höllinni í kvöld. Halldór Örn Tryggvason sem hljóp í skarðið þjálfara liðsins á dögunum verður á hliðarlínunni í kvöld sem þjálfari.
Leikur Þórs og Selfoss U í Höllinni á Akureyri hefst klukkan 19.30 í kvöld.
