Viktor Gísli Hallgrímsson og samherjar í Nantes höfnuðu í þriðja sæti frönsku 1. deildarinnar sem lauk í kvöld þrátt fyrir 10 marka sigur á Sélestat, 31:21, á útivelli. Nantes lauk keppni með 50 stig í þriðja sæti, fjórum stigum á eftir PSG sem varð franskur meistari í enn eitt skiptið. Montpellier hreppti annað sæti með 52 stig og mun sennilega geta sótt um þátttökurétt í Meistaradeild Evrópu. Nantes getur tekið þátt í Evrópudeildinni.
Viktor Gísli var í marki Nantes í skamman tíma í leiknum í kvöld. Hann varði fimm skot, þar af eitt vítakast sem gerði 39% hlutfallsmarkvörslu. Grétar Ari Guðjónsson varði þrjú skot í marki Sélestat, 33,3%. Sélestat var þegar fallið úr deildinni fyrir viðureignina.
Leiktíðinni er ekki alveg lokið hjá Viktori Gísla og liðsmönnum Nantes. Þeir mæta Montpellier í úrslitum bikarkeppninnar á laugardaginn í París.
Donni skoraði níu mörk
Meistarar PSG unnu Kristján Örn Kristjánsson, Donna, og félaga í PAUC, 33:31, í Aix de Province. Donni fór á kostum og skoraði níu mörk í 12 skotum fyrir PAUC og var næst markahæstur allra á leikvellinum. Pólverjinn Kamil Syprzak skoraði 10 mörk í 11 skotum fyrir PSG.
PAUC hafnaði í 11. sæti eftir afar erfitt keppnistímabil.
US Ivry sem Darri Aronsson er samningsbundinn tapaði á heimavelli, 42:30, fyrir Toulouse. US Ivry kom upp í deildina fyrir ári ásamt Sélestat en tókst, ólíkt Sélestat, að halda sæti sínu. Darri hefur verið einstaklega óheppinn með meiðsli og ekkert leikið með liðinu í vetur. Hann mætir tvíefldur til leiks í haust.
Lokastaðan:
