Kvennalið Vals stendur um þessar mundir uppi án línumanns eftir að tilkynnt var að Hildur Björnsdóttir leikur ekki meira með liðinu á keppnistímabilinu hvenær sem keppni hefst á nýjan leik. Hildur er barnshafandi, eftir því sem segir í tilkynningu á Facebook-síðu Vals.
Hinir tveir línumenn Valsliðsins sem eru úr leik eru Ragnheiður Sveinsdótir og Arna Sif Pálsdóttir. Sú fyrrnefnda sleit krossband í byrjun leiktíðar en Arna Sif hefur glímt við þrálát hnémeiðsli í á annað ár.
Lovísa Thompson mun taka við fyrirliðastöðunni hjá Val af Hildi en Lovísa hefur verið varafyrirliði í vetur.
Ágúst Þór Jóhannsson, þjálfari Vals, sagði í skilaboðum til handbolta.is að nú væri úr vöndu að ráða. Ljóst er að hann verður að nota næstu daga meðan æfingar liggja niðri til að leita í kringum sig að línumanni fyrir átökin í Olísdeildinni og Coca Cola-bikarnum þegar keppni hefst aftur, einn góðan veðurdag.
