- Auglýsing -
Sigurleikur kvennaliðs Vals á HC DAC Dunajská Streda, 31:24, í Dunajská í Slóvakíu í Evrópubikarkeppni kvenna í handknattleik var sérlega sögulegur fyrir Ágúst Þór Jóhannsson þjálfara Valsliðsins. Hann stýrði liði í 30. sinn í Evrópukeppni félagsliða.
„Þetta var einn besti leikur liðs undir minni stjórn í Evrópukeppni,“ sagði Ágúst Þór eldhress með sigurinn og áfangann í gærkvöld enda nægði sigurinn góði í tímamótaleiknum til þess að Valur tekur sæti í næstu umferð Evrópubikarkeppinnar. Leikmennn HC DAC Dunajská Streda sitja eftir með sárt ennið.
Ágúst Þór hefur ekki aðeins stýrt Valsliðinu í Evrópubikarkeppni heldur einnig karlaliði Gróttu/KR og norska kvennaliðinu Levanger. Hann var þjálfari Levanger frá 2009 til 2012.
Rúm vika líður þangað til ljóst hvar 31. Evrópuleikur Ágústar verður. Dregið verður í næstu umferð Evrópubikarkeppninnar eftir rúma viku. Síðustu leikjum 1. umferðar lýkur um næstu helgi og þá verður kvennalið ÍBV m.a. í sviðsljósinu í tveimur leikjum á heimavelli gegn gríska liðinu O.F.N. Ionias.
- Auglýsing -