- Auglýsing -
„Við þurftum á sigri á halda í leiknum. Okkar megin markmið var að ná í stigin tvö og það tókst,“ sagði Einar Jónsson, þjálfari Fram, í samtali við handbolta.is eftir sigurinn á Víkingi, 25:23, í Olísdeild karla í handknattleik í Safamýri í dag.
„Frammistaðan hjá okkur var á köflum góð, ekki síst í fyrri hálfleik. Varnarleikurinn var góður og við fengum aðeins á okkur sjö mörk í fyrri hálfleik. Að mörgu leyti var frammistaða okkur svipuð í dag og í fyrri hálfleik gegn Val fyrir nokkrum dögum. Við höfum átt tvo góða fyrri hálfleiki í röð,“ sagði Einar.
Þurfum að ráða bót á slæma kaflanum
„Því miður hafa komið slæmir kaflar upp úr miðjum síðari hálfleik í síðustu leikjum. Það sem einkennir þessa kafla er að við töpum boltanum oft, förum illa með vítaköst og fleira. Við verðum að skoða hvað það er sem gerist á þessum tíma í leiknum. Við verðum að ráða bót á þessum svokallaða slæma kafla,“ sagði Einar Jónsson, þjálfari Fram, í stuttu samtali við handbolta.is í dag.
- Auglýsing -