„Þetta var hörkuleikur þótt leiðir skildu þegar á leið. Ég var ánægður með okkar leik í fyrri hálfleik þótt aðeins hafi munað einu marki þegar honum var lokið. Við vorum skrefinu á undan og náðum tveggja til þriggja marka forskoti í nokkur skipti sem leikmönnum Fram tókst alltaf að saxa niður. Mér leið ekkert illa með okkar leik því vörnin hélt og Björgvin varði vel,“ sagði Snorri Steinn Guðjónsson þjálfari Vals við handbolta.is í kvöld eftir sjö marka sigur Vals á Fram, 34:27, í Origohöllinni. Leiðir liðanna skildu síðustu 20 mínúturnar.
Héldum dampi í 60 mínútur
„Okkar tókst að halda fullum dampi í sextíu mínútur í þessum leik eins og í fleiri leikjum fram til þessa. Það hefur reynst okkur vel,“ sagði Snorri Steinn en lið hans er efst og taplaust með 10 stig eftir fimm leiki og hefur oftar en ekki sýnt styrk sinn er á leikina hefur liðið fram til þessa.
Veittu harða mótspyrnu
„Framarar voru erfiðir andstæðingar að þessu sinni. Þeir líta vel og veittu okkur mikla mótspyrnu. Leikurinn var erfiður. Úrslitin gefa ekki alveg rétt mynd af gangi leiksins því hann var jafnari. Framarar reyndu alls ekki hægja á leiknum og því fagna ég. Við þurftum að eiga fínan leik til þess að vinna,“ sagði Snorri Steinn.
Stigasöfnunin er mikilvæg
„Við erum á fínu róli, vinnum leiki og söfnum stigum. Það er alltaf mikilvægt og ekki síst að áður en dagskrá okkar fer að þéttast með þátttöku í Evrópukeppninni sem hefst í lok þessa mánaðar,“ sagði Snorri Steinn Guðjónsson þjálfari karlaliðs Fram.
Dregið á fimmtudaginn
Dregið verður í riðla Evrópudeildarinar á fimmtudagsmorgun. Þá skýrist hverjir verða andstæðingar Vals í keppninni sem hefst þriðjudaginn 25. október.
