„Við þurfum að vera tilbúin í nánast allt gegn taktísku liði Svartfellinga. Stelpurnar ætla að selja sig dýrt í leikinn, leggja sig fram og hafa gaman af og sjá til hversu langt við komumst gegn Svartfellingum. Í fáum orðum sagt þá búum við okkur undir hörkuleik,“ sagði Ágúst Þór Jóhannsson annar þjálfara U20 ára landsliðs kvenna við handbolta.is eftir að íslenska liðið hafði lokið léttri æfingu í morgunsárið á hóteli sínu í Skopje í Norður Makedóníu.
Leikur klukkan 16.30
Framundan er fyrri viðureignin í milliriðlakeppni 16-liða úrslita heimsmeistaramótsins, gegn Svartfellingum. Flautað verður til leiks klukkan 16.30.
„Við höfum farið vel yfir leiki Svartfellinga á mótinu til þessa. Svartfellingar geta leikið sjö gegn sex í sókninn og bryddað upp á þremur góðum varnarafbrigðum, 6/0, 5 plús 1 og 3/2/1. Við verðum þar af leiðandi að vera reiðbúin hverju sem er,“ sagði Ágúst sem hefur lagt mikla vinnu í undirbúning leiksins ásamt þjálfurunum Árna Stefáni Guðjónssyni og Jóhanni Inga Guðmundssyni.
Búum okkur undir hörku stríð
„Stelpurnar fóru á létta æfingu með styrktarþjálfaranum í morgun. Leikurinn er seint, hálf sjö að kvöldi á staðartíma. Eftir æfinguna í morgun og morgunverð þá fer tíminn fram að leik í að safna orku, hlaða batteríin og búa okkur undir hörku stríð í kvöld,“ sagði Ágúst Þór Jóhannsson annar þjálfara U20 ára landsliðsins í samtali við handbolta.is í morgun.
Handbolti.is verður að vanda með textalýsingu frá leiknum auk þess sem hægt verður að horfa á streymi frá leiknum á handbolti.is.
