- Auglýsing -

Þýskur landsliðsmaður smitaður eftir EM leiki

Alfreð Gíslason, landsliðsþjálfari Þýskalands í handknattleik karla. Mynd/DHB

Einn leikmaður þýska landsliðsins sem tók þátt í leik liðsins gegn Eistlendingum í Tallin í gær reyndist vera smitaður af kórónuveirunni. Það kom í ljós í morgun þegar niðurstöður af sýnatöku lágu fyrir. Þetta kemur fram í tilkynningu sem Handknattleikssamband Þýskalands sendi frá sér nú síðdegis.

Ekki hefur verið gefið upp um hvaða leikmann er að ræða. Félag hans hefur verið upplýst um niðurstöðurna, eins samherjum hans í landsliðinu, þjálfurum og starfsmönnum þýska landsliðsins sem voru með honum í för. Þar á meðal er Alfreð Gíslason, landsliðsþjálfari.

Umræddur leikmaður fór aftur í sýnatöku í dag eftir að niðurstaðan lá fyrir í morgun. Niðurstaða úr prófi dagsins liggur fyrir í fyrramálið og verða viðbrögð metin í framhaldinu.

Í tilkynningu þýska sambandsins segir ennfremur að allir sem tilheyrðu landsliðinu hafi farið í fimm sýnatökur á þeirri viku sem landsliðið var saman, bæði í Þýskalandi og í Eistlandi. Þýska landsliðið kom heim frá Eistlandi seint í gærkvöld en leikið var í Tallinn um miðja dag.

Þýska landsliðið lék tvo leiki, gegn Bosníu og Eistlandi, í undankeppni EM2022. Annan leikinn á síðasta fimmtudag í Düsseldorf og hinn í gær í Eistlandi.

- Auglýsing -
- Auglýsing -

Nýjustu fréttir

- Auglýsing -