Íslendingartríóið hjá sænska úrvalsdeildarliðinu Skara HF létu til sín taka í kvöld þegar liðið sótti BK Heid heim í Heidhallen í Gautaborg og vann með 16 marka mun, 34:18, í sænsku úrvalsdeildinni í handknattleik. Samanlagt skoruðu íslensku konurnar 10 mörk.
Aldís Ásta Heimisdóttir skoraði fimm mörk í átta skotum, Ásdís Guðmundsdóttir fjögur mörk í jafnmörgum skotum og Jóhanna Margrét Sigurðardóttir skoraði eitt mark úr tveimur tilraunum. Aldís Ásta og Jóhanna Margrét áttu þrjár stoðsendingar hvor.
Með þessum góða sigri færðist Skara HF úr 11. sæti og upp í áttunda með sex stig að loknum átta leikjum. Skaraliðið hefur átt erfitt uppdráttar fram til þessa og leikmannahópurinn á tíðum verið þunnskipaður. Vonandi er að rætast úr og að sigurinn í kvöld veiti leikmönnum byr undir báða vængi.
