Eins og e.t.v. flestir reiknuðu með þá lagði efsta lið Olísdeildar kvenna, Fram, neðsta liðið, Aftureldingu í viðureign liðanna að Varmá í kvöld. Sigurinn var hinsvegar torsóttari fyrir Framara en staða liðanna í deildinni gefur til kynna. Aftureldingarliðið veitti harða mótspyrnu svo það varð ekki ljóst fyrr en á allra síðustu mínútunum að sigurinn félli liðinu í skaut, lokatölur, 29:25.
Fram var þremur mörkum yfir í hálfleik, 14:11. Afturelding skoraði þrjú fyrstu mörk síðari hálfleiks og jafnaði metin. Eftir það mátti lengi vel ekki á milli liðanna sjá. Staðan var jöfn, 22:22, þegar níu mínútur voru til leiksloka. Þá tókst Fram að skora þrjú mörk í röð og halda því forskoti til leiksloka.
Aftureldingarliðið heldur áfram að sækja í sig veðrið jafnt og þétt en liðið hefur lengst af leikið vel í síðustu þremur leikjum og ekki verið svo ýkja langt frá því að krækja í sín fyrstu stig í deildinni á leiktíðinni.
Mörk Aftureldingar: Katrín Helga Davíðsdóttir 9/2, Ólöf Marín Hlynsdóttir 8, Sylvía Björt Blöndal 6, Susan Ines Gamboa 2.
Varin skot: Eva Dís Sigurðardóttir 6, 17,1%.
Mörk Fram: Ragnheiður Júlíusdóttir 7/3, Emma Olsson 7, Stella Sigurðardóttir 3, Þórey Rósa Stefánsdóttir 3, Hildur Þorgeirsdóttir 3, Kristrún Steinþórsdóttir 2, Harpa María Friðgeirsdóttir 2, Svala Júlía Gunnarsdóttir 1, Karen Knútsdóttir 1.
Varin skot: Hafdís Renötudóttir 1, Írena Björk Ómarsdóttir 1. (Fyrirvari er settur á þessar tölur en svona er þær þó hjá tölfræðiveitunni HBStatz).
Öll tölfræði leiksins er hjá HBStatz.
Stöðuna og næstu leiki í Olísdeild kvenna má sjá hér.
