Tryggvi Þórisson og samherjar í IK Sävehof gerðu sér lítið fyrir og lögðu meistaralið Ystads IF, 29:26, á heimavelli í sænsku úrvalsdeildinni í handknattleik í dag. Þeir voru þremur mörkum undir að loknum fyrri hálfleik, 16:13, gegn Kim Andersson og félögum en tókst heldur betur að snúa við taflinu í síðari hálfleik. Var það ekki síst fyrir stórleik Simon Möller markvarðar að Sävehof tókst að vinna upp forskotið og tryggja sér sigur. Möller var með ríflega 40% markvörslu.
Tryggvi skoraði ekki mark í leiknum og virtist lítið hafa komið við sögu í sókninni. Hann var hinsvegar fastur fyrir í vörninni og var m.a. vísað af leikvelli tvisvar sinnum í tvær mínútur í hvort skiptið. Pontus Brolin skoraði átta mörk fyrir Sävehof en Anton Månsson var atkvæðamestur hjá meisturunum með sex mörk.
Sävehof er í öðru sæti sænsku úrvalsdeildarinnar með 28 stig eftir 17 leiki og er jafnt IFK Kristianstad að stigum. Síðarnefnda liðið mætir Hammarby síðar í dag. Ystads er í þriðja sæti með 19 stig eins og Alingsås.
