Handknattleiksmaðurinn Tumi Steinn Rúnarsson yfirgefur þýska 2. deildarliðið HSC Coburg í sumar eftir tveggja og hálfs árs veru. Félagið segir frá þessu í dag. Heimildir handbolta.is herma að austurríska liðið Alpla Hard, sem Hannes Jón Jónsson þjálfar, hafi Tuma Stein undir smásjá.
Á tilkynningu Coburg er svo að skilja að eftir samtöl á milli forráðamanna félagsins og Tuma Steins hafi niðurstaðan verið sú að Tumi Steinn endurnýjaði ekki samning sinn.
Tumi Steinn gekk til liðs við HSC Coburg í janúar 2022 frá Val. Hann hefur á þeim tíma gengið í gegnum súrt og sætt með liðinu en það er um þessar mundir í sjötta sæti 2. deildar.
Tumi Steinn, sem er 24 ára gamall, hefur verið aðal leikstjórnandi Coburg-liðsins og mun halda sínu striki út keppnistímabilið en liðið er í harðri baráttu í efri hluta deildarinnar þegar 11 umferðir eru eftir.
