Leikmenn ÍBV fóru á kostum síðustu 20 mínúturnar gegn Haukum í fyrsta úrslitaleik liðanna um Íslandsmeistaratitilinn í handknattleik karla í Vestmannaeyjum í dag. Sú frammistaða sem Eyjamenn sýndu þá nægði þeim til þess að vinna sex marka sigur, 33:27. Staðan var jöfn í hálfleik, 14:14. Næsti leikur liðanna verður á þriðjudaginn á Ásvöllum.
Ríflega 20 mínútum fyrir leikslok voru Haukar með byr í seglum og fimm mörkum yfir, 21:16. Þá snerist leikurinn á stuttum kafla. ÍBV skoraði sex mörk í röð og komst marki yfir, 22:21. Eyjamenn litu ekki um öxl eftir það og unnu þennan loka þriðjung leiksins, 17:6.
ÍBV breytti yfir í 5/1 vörn um það leyti sem vörn var snúið í sókn. Leikmönnum tókst að vinna boltann nokkrum sinnum og fá hraðaupphlaup. Stemningin snerist með heimamönnum. Þeir voru með byr í seglum til enda viðureignarinnar.
Mörk ÍBV: Arnór Viðarsson 6, Rúnar Kárason 6, Kári Kristján Kristjánsson 5/2, Elmar Erlingsson 3/1, Theodór Sigurbjörnsson 3, Janus Dam Djurhuus 3, Sveinn Jose Rivera 2, Gabríel Martinez Róbertsson 1, Dagur Arnarsson 1, Dánjal Ragnarsson 1, Sigtryggur Daði Rúnarsson 1, Róbert Sigurðarson 1.
Varin skot: Pavel Miskevich 11, 30,6% – Petar Jokanovic 1/1, 33,3%.
Mörk Hauka: Guðmundur Bragi Ástþórsson 8/3, Andri Már Rúnarsson 8. Stefán Rafn Sigurmannsson 4, Þráinn Orri Jónsson 3, Brynjólfur Snær Brynjólfsson 3, Ólafur Ægir Ólafsson 1.
Varin skot: Aron Rafn Eðvarðsson 9/1, 24,3% – Matas Pranckevicus 1, 16,7%.
Handbolti.is fylgdist með leiknum í textalýsingu hér fyrir neðan.
