- Auglýsing -
Pólsku handknattleikskonurnar Marta Wawrzynkowska og Karolina Olszowa hafa skrifað undir nýjan tveggja ára samning við ÍBV. Báðar eru þær langt komnar með sitt þriðja tímabil með ÍBV eftir að hafa komið til félagsins frá heimalandinu.
Wawrzynkowska er ein af bestu markvörðum Olísdeildarinnar. Hún er í öðru sæti á lista yfir hlutfallslega flest varin skot í leik á keppnistímabilinu, 37,3% samkvæmt HBStatz.
Olszowa er mjög öflugur leikmaður, jafnt í vörn sem sókn og hefur átt stóran þátt í velgengni liðsins undanfarið.
ÍBV hefur unnið sjö leiki í röð í Olísdeildinni og í Evrópubikarkeppninni.
„Báðar hafa þær spilað stór hlutverk í liði okkar undanfarin ár. Þær eru mjög ánægðar með veruna í Vestmannaeyjum og hafa komist vel inn í Eyjasamfélagið. Það eru því mikil gleðitíðindi að tilkynna að þær ætli sér að vera hér til a.m.k. 2 ára í viðbót,“ segir í tilkynningu handknattleiksdeildar ÍBV í kvöld.
- Auglýsing -
