Hinn ungi og stórefnilegi leikmaður Aftureldingar, Þorsteinn Leó Gunnarsson, hefur verið úrskurðaður í eins leiks keppnisbann eftir að hafa fengið rautt spjald á síðustu sekúndum viðureignar Fram og Aftureldingar í annarri umferð Olísdeildar karla í Framhúsinu á síðasta fimmtudag.
Bragi Axelsson starfsmaður Harðar hlaut einnig útilokun með skýrslu vegna grófrar óíþróttamannslegrar framkomu í leik Harðar og Vængja Júpíters í Grill 66-deildinni á síðasta föstudag og verður að bíta úr nálinni með það. Hann hlaut eins og Þorsteinn Leó eins leiks keppnisbann.
Þetta kemur fram í úrskurði aganefndar HSÍ sem birtist á vef HSÍ í dag.
Logi Snædal Jónsson leikmaður Víkings og Garðar Benedikt Sigurjónsson, leikmaður Vængja Júpíters, sem einnig hlutu útlokun með skýrslu sluppu hinsvegar fyrir horn og verða gjaldgengir í næstu leikjum liðanna sinna í Grill 66-deildinni um komandi helgi.
