Tveir af þremur markvörðum karlaliðs Stjörnunnar, Adam Thorstensen og Arnór Freyr Stefánsson, hafa verið fjarri góðu gamni í síðustu leikjum liðsins í Olísdeildinnni. Fyrir vikið hefur Brynjar Darri Baldursson dregið fram skóna á nýjan leik og staðið á milli stanganna í marki Stjörnunnar í tveimur síðustu leikjum.
Flest bendir til þess að Brynjar Darri standi vaktina í leikjunum sem Stjarnan á eftir á árinu ásamt Sigurði Dan Óskarssyni sem hefur reyndar einnig orðið af leikjum.
„Adam er enn frá eftir að hafa fengið skot í höfuðið í leik með unglingalandsliðinu. Hann verður ekki meira með okkur á þessu ári,“ sagði Patrekur Jóhannesson, þjálfari Stjörnunnar við handbolta.is dag.
„Arnór Freyr er og hefur verið meiddur í hné og óvíst hvenær hann getur spilað aftur,“ sagði Patrekur sem hefur kallað Brynjar Darra til leiks aftur en þeir höfðu slegið varnagla þegar Brynjar Darri ákvað að rifa seglin í vor til að einbeita sér að námi í arkitektur.
„Við Brynjar ræddum saman fyrir tímabilið um að hann yrði til taks ef við lentum í vændræðum. Brynjar Darri hefur haldið sér í góðu formi svo það var lítið mál fyrir hann að koma inn verandi í góðu formi og þekkja liðið vel,“ sagði Patrekur en lið hans hefur eins og fleiri í Olísdeildinni fengið sinn skerf af meiðslum síðustu vikur og mánuði.
Stjarnan á þrjá leiki eftir fyrir áramóti. Hún mætir Aftureldingu tvisvar með skömmu millibili, fyrst í Olísdeildinni á föstudaginn og síðan í 32-liða úrslitum Coca Cola-bikarsins á þriðjudaginn eftir viku. Síðasti leikurinn fyrir jólaleyfi verður við ÍBV í Vestmannaeyjum annan föstudag.
Stöðuna og næstu leiki í Olísdeild karla má sjá hér.
