Orri Freyr Þorkelsson skoraði þrjú mörk í dag fyrir Elverum þegar liðið vann Sandnes með átta marka mun á heimavelli í dag, 30:22, í norsku úrvalsdeildinni í handknattleik. Með sigrinum komst Elverum upp í þriðja sæti deildarinnar, alltént að sinni, með 12 stig að loknum níu leikjum. Elverum var sex mörkum yfir að loknum fyrri hálfleik, 17:11.
Orri Freyr hitar upp í Haukatreyju í dag. En allir leikmenn @ElverumHandball hita upp í búningum uppeldisfélags fyrir leik dagsins🙂🏐
— Haukar – Handbolti (@Haukarhandbolti) November 13, 2022
📷 : Þorkell Magnússon pic.twitter.com/qLZ5X1ROpW
Óskar Ólafsson skoraði fjögur mörk og Viktor Petersen Norberg eitt í öruggum sigri Drammen á Kristiansand Topphåndball í Drammenhallen í dag, 35:26. Drammen situr í öðru sæti deildarinnar með 14 stig en hefur lagt að baki 10 leiki.
Örn Vésteinsson Östenberg skoraði eitt mark fyrir Haslum í enn einu tapi liðsins. Að þessu sinni fyrir Halden, 35:32, í Remmenhallen, heimavelli Halden. Örn og félagar hafa átt erfitt uppdráttar á tímabilinu. Þeir eru neðstir með tvö stig þegar þeir hafa lokið níu leikjum.
Kolstad, sem Janus Daði Smárason og Sigvaldi Björn Guðjónsson leika með, er efst og taplaust með 16 stig eftir átta leiki. Kolstad lék ekki í dag.
