„Ég er ánægður og með sigurinn og þá staðreynd að ég fékk framlag frá mörgum leikmönnum að þessu sinni,“ sagði Ásgeir Örn Hallgrímsson þjálfari Hauka sem augljóslega létt eftir að lið hans lagði Aftureldingu, 26:24, í 16. umferð Olísdeild karla í handknattleik á Varmá í kvöld.
Ásgeir Örn viðurkenndi að Haukar hafi ekki tekið áhættu í leiknum. Menn hafi reynt að vera öruggir og gætt þess að tapa ekki.
„Það hefur orðið okkur að falli í tveimur síðustu deildarleikjum að menn hafi ekki haldið einbeitingu til leiksloka og gert klaufaleg mistök. Að þessu sinni náðum við að halda út til enda. Það var það markmið okkar fyrir leikinn að halda einbeitingu til loka og fækka einföldum mistökum,“ sagði Ásgeir Örn sem eins og margir Haukar gladdist yfir því að sjá Aron Rafn Eðvarðsson sýna gamalkunna tilburði í markinu í síðari hálfleik.
Munar miklu að fá svona markvörslu
„Aron Rafn var frábær. Það munar miklu fyrir okkur að fá svona góða markvörslu og veitir um leið vörninni ákveðna ró. Fyrir vikið getum við stílað betur inn á þau atriði sem við erum góðir í um þessar mundir,“ sagði Ásgeir Örn Hallgrímsson þjálfari Hauka í samtali við handbolta.is eftir leikinn.
