Efsta lið Grill 66-deildar kvenna í handknattleik, KA/Þór, tapaði öðru stigi á leiktíðinni í kvöld þegar liðið sótti heim HK í Kórinn. Tinna Valgerður Gísladóttir jafnaði metin fyrir Akureyrarliðið úr vítakasti þegar rétt innan við mínúta var til leiksloka, 23:23. Þar við sat þótt bæði lið næðu sókn eftir mark Tinnu Valgerðar sem skoraði tíu sinnum að þessu sinni.
KA/Þór missti tvo leikmenn af leikvelli í fyrri hálfleik með rautt spjald.
Þrátt fyrir stigið tapaða þá hefur KA/Þór talsvert forskot í efsta sæti Grill 66-deildar, 24, eftir 13 leiki. Afturelding er fimm stigum á eftir þegar fimm umferðir eru eftir. HK er síðan stigi á eftir Aftureldingu í þriðja sæti svo ljóst er að áfram verður bitist um annað sæti.
HK komst yfir undir lok fyrri hálfleiks og var tveimur mörkum yfir í hálfleik, 13:11. Nokkru áður hafði KA/Þórsliðið orðið fyrir talsverðum skakkaföllum með nokkurra mínútna millibili þegar Sólveig Lára Kristjánsdóttir og Susanne Denise Pettersen fengu rautt spjald með nokkurra mínútna millibili. Þar með voru báðir miðjumennirnir í vörninni úr leik. Munaði svo sannarlega um minna. Pettersen er þar á ofan mikilvæg í sóknarleiknum.
Kópavogsliðið var síðan með yfirhöndina allan síðari hálfleik, eitt til tvö mörk, með fáeinum undantekningum þegar KA/Þór tókst að jafna metin. Lokakaflinn var hnífjafn og spennandi og e.t.v. var jafntefli sanngjörn niðurstaðan þegar upp var staðið.
Staðan og næstu leikir í Grill 66-deildum.
Mörk HK: Aníta Eik Jónsdóttir 5, Amelía Laufey G. Miljevic 4, Jóhanna Lind Jónasdóttir 4, Leandra Náttsól Salvamoser 4, Hekla Fönn Vilhelmsdóttir 2, Katrín Hekla Magnúsdóttir 2, Anna Valdís Garðarsdóttir 1, Tinna Ósk Gunnarsdóttir 1.
Varin skot: Danijela Sara Björnsdóttir 7, Tanja Glóey Þrastardóttir 6.
Mörk KA/Þórs: Tinna Valgerður Gísladóttir 10, Bergrós Ásta Guðmundsdóttir 5, Anna Þyrí Halldórsdóttir 2, Aþena Einvarðsdóttir 2, Elsa Björg Guðmundsdóttir 1, Kristín A. Jóhannsdóttir 1, Ólöf Kristín Þorsteinsdóttir 1, Unnur Ómarsdóttir 1.
Varin skot: Matea Lonac 6, Sif Hallgrímsdóttir 1.
