U15 ára landslið kvenna í handknattleik vann færeyska landsliðið í sama aldursflokki með fjögurra marka mun, 26:22, í fyrri æfingaleiknum í Færeyjum í dag en þrjú yngri landslið kvenna frá Íslandi eru ytra þessa helgi.
Leikurinn var jafn lengi vel en íslenska liðið var þremur mörkum yfir í hálfleik, 12:9. Í seinni hálfleik var Ísland yfir allan tímann en færeyska liðið náði áhlaupum á milli. Íslensku stúlkurnar stóðust öll áhlaup og unnu með fjögurra marka mun, 26:22. Liðin mætast öðru sinni á morgun í Vestmanna.
Mörk Íslands: Ester Elísabet Guðbjartsdóttir 7, Laufey Helga Óskarsdóttir 4, Agnes Lilja Styrmisdóttir 2, Ebba Guðríður Ægisdóttir 2, Elín Vilhjálmsdóttir 2, Hrafnhildur Markúsdóttir 2, Sigrún Erla Þórarinsdóttir 2, Silja Katrín Gunnarsdóttir 2, Tinna Ósk Gunnarsdóttir 2, Bryndís Hulda Ómars 1.
Sigrún Ásta Möller varði 7 skot í markinu og Danijela Sara Björnsdóttir varði 2 skot.
