Piltarnir í U17 ára landsliðinu í handknattleik karla mæta Spánverjum í leik um 5. sætið á Ólympíuhátíð Evrópuæskunnar í Zvolen í Slóvakíu á morgun eftir að hafa unnið Slóvena, 26:23, í dag. Slóvenar mæta aftur á móti Slóvökum í viðureign um 7. sætið í keppninni.
Ísland og Spánn mættust í riðlakeppninni á miðvikudaginn. Spánverjar unnu með níu marka mun, 34:25. Íslensku piltarnir geta þar með leitað hefnda í viðureigninni um 5. sætið í fyrramálið.
Slóvenar voru marki yfir að loknum fyrri hálfleik, 12:11, eftir jafnan fyrri hálfleik.
Íslensku strákarnir mættu tvíefldir til leiks í síðari hálfleik og náðu fljótt tökum á leiknum. Þar með sneru þeir taflinu við og unnu kærkominn og góðan sigur með þriggja marka mun, 26:23.
Leikurinn við Spánverja um 5. sætið verður snemma í fyrramálið. Spánverjar kjöldrógu Slóvaka, 37:19, í dag.
Mörk Íslands: Patrekur Guðmundsson Öfjörð 7, Eiður Rafn Valsson 5, Andri Clausen 4, Ásgeir Bragi Bryde Þórðarson 4, Gísli Rúnar Jóhannsson 3, Örn Alexandersson 2, Daníel Stefán Reynisson 1.
Arnþór Sævarsson meiddist á ökkla í viðureign á síðasta miðvikudag og var ekki með í dag. Hann verður heldur ekki með í leiknum í fyrramálið.
Undanúrslitaleikjum mótsins er ólokið og þar með eru ekki öll kurl komin til grafar.
