Eftir tvær umferðir af þremur í A-riðli heimsmeistaramóts kvenna í handknattleik, skipað leikmönnum 18 ára og yngri, stendur íslenska landsliðið vel að vígi í kapphlaupinu um sæti í 16-liða úrslitum mótsins.
Á morgun klukkan 10.30 leikur íslenska landsliðið við Alsír og þarf íslenska liðið að ná einu stigi úr leiknum til að komast áfram í milliriðil. Jafnvel gæti íslenska liðið farið áfram þótt það tapi fyrir Alsír ef Svartfellingar vinna eða gera jafntefli við Svía. Íslenska landsliðið stendur betur að vígi gagnvart sænska landsliðinu eftir sigur á laugardaginn, 22:17.
Svartfjallaland og Svíþjóð mætast klukkan 18.30 á morgun.
Ef íslenska landsliðið vinnur eða gerir jafntefli við Alsír og fer áfram í milliriðlakeppni efri liðanna sextán fer liðið áfram með eitt stig ef Svartfellingar fylgja með. Ef Svíar fljóta með íslenska liðinu áfram í hóp efri liðanna þá fer Ísland áfram með tvö stig. Þess vegna væri hagstæðara fyrir Ísland að Svíþjóð vinni Svartfjallaland.
| Svartfjallaland | 2 | 1 | 1 | 0 | 56 – 34 | 3 |
| Ísland | 2 | 1 | 1 | 0 | 40 – 35 | 3 |
| Svíþjóð | 2 | 1 | 0 | 1 | 71 – 52 | 2 |
| Alsír | 2 | 0 | 0 | 2 | 46 – 92 | 0 |
Keppt er í átta fjögurra liða riðlum á HM. Að loknum þremur umferðum í riðlakeppninni fara tvö efstu lið hvers riðils áfram í 16-liða úrslit. Þau tvö sem hafna í þriðja og fjórða sæti leika um sæti 17 til 32.
Í milliriðlum (16-liða úrslitum) verða fjórir fjögurra liða riðlar. Sem dæmi þá fara tvö efstu lið A-riðils í riðil með tveimur efstu liðum B-riðils. Ljóst er að Norður Makedónía og Íran verða í tveimur efstu sætum A-riðils.
C og D-riðlar blandast saman á sama hátt, E og F og einnig G og H.
Leikir milliriðla fara fram miðvikudaginn 3. ágúst og föstudaginn 5. ágúst.
Eftir milliriðla komast átta lið áfram í átta liða úrslit og leika um efstu sæti. Eins verður leikið áfram um níunda til sextánda sætið.
Svipaður háttur verður á í keppni um 17. til 32. sæti.
