Aganefnd HSÍ hefur úrskurðað Úlf Gunnar Kjartansson leikmann ÍR í þriggja leika keppnisbann og Hörð Flóka Ólafsson, sem var starfsmaður Þórs Akureyri í viðureign við ungmennalið Fram á síðasta laugardag, í tveggja leikja bann.
Úrskurð sinn felldi aganefnd í gær eftir að hafa tekið sér umhugsunarfrest þegar mál Úlfs Gunnars og Harðar Flóka voru fyrst tekin fyrir á vikulegum fundi nefndarinnar á þriðjudaginn.
Úlfur Gunnar fær sitt langa bann vegna leikbrota í viðureign KA og ÍR 6. okótber. Erindi barst aganefnd frá framkvæmdastjóra HSÍ en Úlfi Gunnari var ekki refsað fyrir brotin í leiknum.
„Aganefnd hefur kynnt sér myndbandsupptökur og ljósmyndir af atvikunum. Aganefnd telur sér heimilt að aðhafast vegna þessa máls og að atvikin feli í sér leikbrot sem skaðað geti ímynd handknattleiksíþróttarinnar í skilningi 6. kafla reglugerðarinnar,“ segir í fundargerð aganefndar.
Hörður Flóki hlaut útilokun með skýrslu vegna mjög grófrar ódrengilegrar hegðunar í leik Þórs og Fram U á síðasta laugardagin. „Með tilvísun í 10. gr. reglugerðar HSÍ um agamál er það niðurstaða aganefndar að starfsmaðurinn er úrskurðaður í tveggja leikja bann,“ segir í úrskurðinum sem birtur var á vef HSÍ skömmu fyrir hádegið.
Eftir því sem handbolti.is kemst næst mun fyrrgreind gróf ódrengileg hegðun Harðar Flóka hafa beinst gegn starfsmanni Framliðsins.
