Ungversku meistararnir beina sjónum að trjárækt

Ungverska meistaraliðið Telekom Veszprém, sem Bjarki Már Elísson landsliðsmaður leikur með, hefur gengið til liðs við félagsskap sem kallast Climate Action Kft.

Samvinna félaganna gengur út á að fyrir hvern aðgöngumiða sem seldur verður á heimaleikjum Telekom Veszprém á komandi leiktíð rennur ákveðin föst upphæð til trjáræktar. 

Með samstarfinu, sem hefst frá og með ágústmánuði þegar sala ársmiða fyrir næsta tímabil hefst, vill Telekom Veszprém draga út kolefnisspori sínu og vekja um leið stuðningsfólk sitt til vitundar um nauðsyn trjáræktar í baráttu heimsins gegn loftslagsbreytingum og hamfarahlýnun þeim samhliða.