Hinn þrautreyndi handknattleiksmaður Aftureldingar, Einar Ingi Hrafnsson, var í dag úrskurðaður í tveggja leikja bann á fundi aganefndar HSÍ. Var þetta annar fundur aganefndar vegna málsins en hún ákvað að fresta úrskurði á venjubundnum fundi sínum á þriðjudaginn meðan beðið var greinargerðar frá Aftureldingu vegna útilokunar sem Einar Ingi fékk í leik Aftureldingar og Fram í Olísdeild karla síðustu viku.
Dómarar mátu brotið falla undir reglu 8:6 a).
Í úrskurði aganefndar frá aukafundi í dag segir: „Aganefnd hefur skoðað gögn málsins, þ.m.t. myndbandsupptöku af atvikinu og telur brotið réttilega heimfært af dómurum leiksins sem brot gegn reglu 8.6 a).
Niðurstaða aganefndar er tveggja leikja bann.”
Rétt er að rifja upp reglu 8.6. „Ef dómararnir meta aðgerð sem sérstaklega gáleysislega, sérstaklega hættulega, úthugsaða eða illkvittnislega, verða þeir að skila skriflegri skýrslu eftir leik þannig að viðeigandi yfirvöld geti tekið ákvörðun um frekari viðbrögð.a) sérstaklega gáleysisleg eða sérstaklega hættuleg aðgerð.“
Einar Ingi tekur þar með út leikbann þegar Afturelding sækir Selfoss heim 17. mars og fær Gróttu í heimsókn að Varmá fjórum dögum síðar.
Fleiri mál lágu ekki fyrir aganefnd í þessari viku.
