Eftir að síðustu umferð Olísdeildar karla lauk í dag er ljóst hvaða lið mætast í úrslitakeppninni og hver falla niður í Grill 66-deildina. Hið síðarnefnda kemur í hlut ÍR-inga sem töpuðu fyrir Fram í dag, 32:30, á sama tíma og KA vann Gróttu, 31:30, í Hertzhöllinni. Hörður er auk þess fallinn úr Olísdeildinni fyrir nokkru síðan.
Úrslitakeppnin hefst á laugardaginn með tveimur leikjum. Aðrir tveir fara fram á sunnudaginn. Á morgun verður væntanlega staðfest hvenær hvaða lið mætast í fyrstu umferð.
Haukar kræktu í áttunda sætið og mæta Val í átta liða úrslitum. Valur er deildarmeistari þrátt fyrir tap í fjórum síðustu leikjum sínum í Olísdeildinni. ÍBV vann Val í dag með 10 marka mun, 35:25, í Origohöllinni og innsiglaði þriðja sætið og rimmu við Stjörnuna í átta liða úrslitum. FH mætir Selfossi en liðin tóku forskot á sæluna með jafntefli í Kaplakrika í dag, 31:31. Grannliðin Fram og Afturelding eigast við og fær Fram heimaleikjarétt.
Viðureignir átta liða úrslita verða á milli eftirtalinna liða:
Valur – Haukar.
FH – Selfoss.
ÍBV – Stjarnan.
Fram – Afturelding.
- Tveir fyrstu leikirnir verða laugardaginn 15. apríl. Tveir þeir næstu sunnudaginn 16. apríl.
- Önnur umferð verður 18. og 19. apríl. Oddaleikir átta liða úrslita, föstudaginn 21. apríl og laugardaginn 22. apríl.
