Níu leikir eru eftir í Olísdeild kvenna áður en deildarmeistari 2022 verður krýndur. Einn leikur stendur út af borðinu, viðureign ÍBV og Aftureldingar úr 16. umferð sem fram fer á morgun.
Eftir það taka við tvær síðustu umferðir deildarinnar, sú fyrri af tveimur fer fram á laugardaginn. Leikir lokaumferðarinnar verða háðir á fimmtudaginn í næstu viku, skírdag. Úrslitaleikir í toppbaráttunni eru framundan í báðum umferðum.
Aðeins munar tveimur stigum á Fram sem er í efsta sæti og deildarmeisturum síðasta árs, KA/Þór sem einnig er ríkjandi Íslandsmeistari. KA/Þór er í þriðja sæti. Valur er mitt á milli liðanna tveggja. Fram og Valur mætast á laugardaginn í Framhúsinu. Á sama tíma tekur KA/Þór á móti Aftureldingu sem er fyrir nokkru fallin úr deildinni.
ÍBV getur tryggt sér góða stöðu í þriðja sæti takist liðinu að vinna Aftureldingu í Eyjum á morgun. Eftir það tekur við heimsókn á Ásvelli til Hauka á laugardaginn áður en ÍBV mætir Fram í Eyjum á skírdag.
Valur og KA/Þór leiða saman hesta sína í lokaumferðinni. Sú viðureign getur ráðið miklu um röðina á liðunum í þremur efstu sætum.
Tvö efstu lið Olísdeildar kvenna að kveldi 14. apríl sitja yfir í fyrstu umferð úrslitakeppninnar. Liðið sem hafnar í þriðja sæti mætir því sem verður í sjötta sæti og liðin í sætum fjögur og fimm eigast við. Vinna þarf tvo leiki til að komast í undanúrslit þar sem efstu tvö liðin mæta til leiks.
HK hafnar í næst neðsta sæti annað árið í röð og tekur þátt í umspili við lið úr Grill66-deild kvenna. Í fyrstu umferð umspilsins leika saman HK og Grótta. Margt bendir til að hin viðureignin verði á milli ÍR og FH. Sigurliðin í fyrstu umferð leika í allt að þriggja leikja einvígi um keppnisrétt í Olísdeildinni á næstu leiktíð. Selfoss stendur vel að vígi í efsta sæti Grill66-deildar og mun væntanlega leysa Aftureldingu af hólmi í Olísdeildinni í haust.
Leikirnir sem eftir eru Olísdeild kvenna:
16.umferð miðvikudaginn 6. apríl, 17.30:
ÍBV – Afturelding.
20.umferð laugardaginn 9. apríl, kl. 16:
Fram – Valur.
HK – Stjarnan.
Haukar – ÍBV.
KA/Þór – Afturelding
21.umferð fimmtudaginn 14. apríl, kl. 16:
Stjarnan – Haukar.
ÍBV – Fram.
Valur – KA/Þór.
Afturelding – HK.
Staðan í Olísdeild kvenna:
