Útlit er fyrir að Kristján Ottó Hjálmsson leikmaður Aftureldingar sé rifbeinsbrotinn eftir að hafa fengið á sig högg í viðureign Aftureldingar og ÍBV í Olísdeild karla í handknattleik á síðasta fimmtudag eftir viðskipti sín við Sigtrygg Daða Rúnarsson leikmann ÍBV. Sigtryggur Daði uppskar rautt spjald.
Gunnar Magnússon þjálfari Aftureldingar sagði við handbolta.is að ekki hafi fengist staðfesting á meiðslum Kristjáns en það líti út fyrir að um rifbeinsbrot sé að ræða. Viðbeinið er ekki brákað eins og og sagt var í hlaðvarpsþættinum Handkastið síðasta laugardag.
„Ef um rifbeinsbrot er að ræða þá þýðir það margar vikur frá keppni,“ sagði Gunnar sem er með Aftureldingarliðið í efsta sæti Olísdeildar um þessar mundir, 11 stig hafa safnast saman í sjö leikjum.
Mæta Stjörnunni annað kvöld
Næsti leikur Aftureldingar verður gegn Stjörnunni í Hekluhöllinni annað kvöld þegar þrír leikir fara fram í áttundu umferð Olísdeildar karla. Gunnar sagðist hlakka til leiksins. „Það verður bara hörkuleikur, engin spurning,“ sagði Gunnar. Stjarnan hefur fengið þrjú stig af fjórum mögulegum í tveimur síðustu leikjum sínum.
Auk viðureignar Stjörnunnar og Aftureldingar í Hekluhöllinni tekur HK á móti ÍR í Kórnum og Fjölnismenn fá Gróttumenn í heimsókn í Fjölnishöllina í Grafarvogi.
Leikirnir þrír annað kvöld hefjast stundvíslega klukkan 19.30. Allir verða sendir út á Handboltapassanum.
Staðan og næstu leikir í Olísdeildum.
