Valur vann stórsigur á Selfossi í heimsókn í Sethöllina á Selfossi í kvöld í 16. umferð Olísdeildar kvenna í handknattleik, 33:19, eftir að hafa verið fimm mörkum yfir að loknum fyrri hálfleik, 15:10. Valur er efstur í deildinni með 28 stig eftir 16 leiki en Selfoss er næst neðst með sex stig.
Selfossliðið varð fyrir miklu áfalli á sjöttu mínútu síðari hálfleiks, í stöðunni 17:13, fyrir Val, þegar öflugasti leikmaðurinn Roberta Stropé meiddist illa og var borin sárþjáð af leikvelli. Hún virtist koma illa niður eftir að hafa stokkið upp og skotið að marki Vals.
Eftir að Strope naut ekki lengur við var mesta púðrið skiljanlega úr Selfossliðinu og getumunurinn varð ennþá greinilegri. Ungir leikmenn Selfoss reyndu hvað þeir gátu en gerðu e.t.v. fullmörg mistök auk þess sem markverðir Valsliðsins reyndust erfiðir. Munur jókst jafnt og þétt.
Valur var með öll tök á leiknum í fyrri hálfeik. Selfossliðið átti góða spretti og náði nokkrum sinnum að minnka nokkuð muninn, m.a. í 12:9.
Eftir áfallið í snemma í síðari hálfleik endurspeglaðist ennþá betur að Selfossliðið átti við ofurefli að etja og lítið við því að gera.
Mörk Selfoss: Roberta Stropé 5, Tinna Soffía Traustadóttir 5, Katla María Magnúsdóttir 3, Arna Kristín Einarsdóttir 2, Rakel Guðjónsdóttir 1, Hulda Hrönn Bragadóttir 1, Elínborg Katla Þorbjörnsdóttir 1, Katla Björg Ómarsdóttir 1.
Varin skot: Cornelia Hermansson 13, 30,4% – Ágústa Tanja Jóhannsdóttir 0.
Mörk Vals: Þórey Anna Ásgeirsdóttir 11/6, Thea Imani Sturludóttir 7, Mariam Eradze 4, Karlotta Óskarsdóttir 3, Hildigunnur Einarsdóttir 2, Lilja Ágústsdóttir 2, Elín Rósa Magnúsdóttir 1, Brynja Katrín Benediktsdóttir 1, Sara Dögg Hjaltadóttir 1, Sigríður Hauksdóttir 1.
Varin skot: Sara Sif Helgadóttir 10, 40% – Hrafnhildur Anna Þorleifsdóttir 7, 63,6%.
Handbolti.is fylgdist með leiknum í textalýsingu hér fyrir neðan.
