Valur vann Fram í uppgjöri Reykjavíkurliðanna í Olísdeild kvenna í handknattleik í Origohöllinni í dag, 24:22, og heldur þar með efsta sæti deildarinnar þegar liðið á fjóra leiki eftir óleikna. Valur hefur 30 stig eftir 17 leiki og er 11 stigum á undan Fram sem er í fjórða sæti. Staðan var jöfn eftir fyrri hálfleik í Origohöllinni, 11:11.
Framarar voru heldur sterkari í fyrri hálfleik en tókst illa að nýta sér það til þess að ná einhverri forystu að ráði. Hafdís Renötudóttir varði allt hvað af tók í marki Fram meðan kollegar hennar hinum megin vallarins voru ekki öflugar.
Fljótlega í síðari hálfleik tók Valsliðið af skarið og komst fram úr. Mestur varð munurinn fimm mörk, 20:15, þegar tíu mínútur voru til leiksloka, þrátt fyrir að Hafdís héldi uppteknum hætti í marki Fram.
Undir lokin reyndi Framliðið hvað sem það gat til þess að jafna metin. Leikið var með sjö menn í sókn og nánast maður á mann í vörninni. Leikmenn Vals voru vandanum vaxnir og stóðu af sér gagnsókn Framliðsins.
Mörk Vals: Þórey Anna Ásgeirsdóttir 6/3, Sara Dögg Hjaltadóttir 4, Mariam Eradze 4, Elín Rósa Magnúsdóttir 3, Hildigunnur Einarsdóttir 2, Thea Imani Sturludóttir 2, Auður Ester Gestsdóttir 1, Sigríður Hauksdóttir 1, Lilja Ágústsdóttir 1.
Varin skot: Sara Sif Helgadóttir 7/1, 25%. – Hrafnhildur Anna Þorleifsdóttir 1, 50%.
Mörk Fram: Steinunn Björnsdóttir 5, Madeleine Lindholm 5, Kristrún Steinþórsdóttir 3, Þórey Rósa Stefánsdóttir 3, Perla Ruth Albertsdóttir 2/1, Tinna Valgerður Gísladóttir 2/1, Sara Katrín Gunnarsdóttir 1, Erna Guðlaug Gunnarsdóttir 1.
Varin skot: Hafdís Renötudóttir 18/1, 43,9%.
Staðan í Olísdeild kvenna.
