Ekkert hik er að finna á leikmönnum Vals í Olísdeild kvenna. Valur vann í kvöld þriðja leik sinn í deildinni er liðið sótti Stjörnuna heim og sigraði örugglega, 31:23, eftir að hafa verið tveimur mörkum undir í hálfleik, 15:13.
Valsliðið sneri leiknum sér í hag strax í byrjun síðari hálfleiks, náði fljótlega þriggja til fjögurra marka forskoti. Leikmenn litu aldrei um öxl eftir það. Varnarleikurinn var framúrskarandi og markvarslan til fyrirmyndar hjá Sara Sif Helgadóttir. Stjörnuliðið náði sér aldrei á strik og svo virtist sem sjálfstraust leikmanna fjaraði jafnt og þétt út eftir því sem á hálfleikinn leið.
Thea Imani Sturludóttir, Hildigunnur Einarsdóttir og Sara Sif léku afar vel fyrir Valsliðið. Eins var Mariam Eradze mjög góð í síðari hálfleik.
Markvörðurinn Darija Zecevic var best í liði Stjörnunnar. Eva Björk var skást af sóknarmönnum liðsins er eiga að geta gert betur en þeir gerðu í síðari hálfleik.
Valur hefur þar með sex stig eftir þrjá leiki í deildinni en Stjarnan er með tvö stig að loknum fjórum leikjum.
Mörk Stjörnunnar: Eva Björk Davíðsdóttir 7/2, Ásthildur Bertha Bjarkadóttir 4, Elísabet Gunnarsdóttir 4, Stefanía Theodórsdóttir 3, Lena Margrét Valdimarsdóttir 2, Katla Magnúsdóttir 1, Elena Elísabet Birgisdóttir 1, Anna Karen Hansdóttir 1.
Varin skot: Darija Zecevic 15, 35,7%.
Mörk Vals: Thea Imani Sturludóttir 9/5, Mariam Eradze 6, Auður Ester Gestsdóttir 6, Lilja Ágústsdóttir 3, Hildigunnur Einarsdóttir3, Elín Rósa Magnúsdóttir 2, Ída Margrét Stefánsdóttir 1, Hildur Björnsdóttir 1.
Varin skot: Sara Sif Helgadóttir 20, 46,5%.
Handbolti.is var í TM-höllinni og fylgdist með leiknum í stöðu- og textauppfærslu hér fyrir neðan.
