„Það eru miklar tilfinningar í þessu hjá okkur og því er svekkelsið mikið. Okkur langar mjög mikið í milliriðlakeppnina í Þrándheimi en það vantaði svo grátlega lítið upp á,“ sagði Sunna Jónsdóttir fyrirliði íslenska landsliðsins við handbolta.is í Stavangri í kvöld eftir jafntefli við Angóla í síðustu umferð riðlakeppni HM. Jafnteflið nægði Angóla til þess að komast áfram í milliriðlakeppnina á kostnað íslenska landsliðsins sem fer til Frederikshavn í Danmörk í keppni átta neðstu liða mótsins.
„Ég er afar stolt af liðinu. Þessi leikur og niðurstaðan er hluti af þroskaferli sem liðið er á,“ sagði Sunna ennfremur sem reiknar með að leikmönnum reynist ekki auðvelt að sofna í kvöld eftir þessa niðurstöðu enda er hún öllum gríðarleg vonbrigði.
„Við gerðum okkur sek um nokkur atriði sem við hefðum getað gert betur en samt sem áður erum við að spila vel á köflum og náðum til dæmis að byrja leikinn betur en tvo þá fyrri. Okkur tókst að halda okkur inn í leiknum allan tímann,“ sagði Sunna og bætti við að það var alltaf viðbúið að um jafna viðureign yrði að ræða.
„Við höfðum fulla trú á verkefninu allan tímann, börðumst eins og ljón til leiksloka. Svo þegar frá líður verðum við að fara yfir leikinn og læra af reynslunni. Angóla liðið vann kannski á reynslunni að þessu sinni,“ sagði Sunna.
Nú tekur við keppnin um forsetabikarinn í Danmörku en keppni hefst á fimmtudaginn.
„Það verður erfitt að fara til Danmerkur. Mig hefur aldrei langað eins mikið til Þrándheims og í dag. En við núllstillum okkur og tökumst á við verkefnin sem bíða okkar í Danmörku og klárum þau með sóma,“ sagði Sunna Jónsdóttir fyrirliði íslenska landsliðsins í samtali við handbolta.is í DNB Arena í kvöld.
