Ágúst Elí Björgvinsson, landsliðsmarkvörður, og samherjar í Kolding náðu ekki að tryggja sér þátttökurétt í 8-liða úrslitum um danska meistaratitilinn í kvöld þegar þeir mættu Holstebro í næst síðustu umferð, þeirri 25., í úrvalsdeildinni. Holstebro sem er í þriðja sæti deildarinnar unnu öruggan sigur, 30:24, eftir að hafa verið tveimur mörkum yfir að loknum fyrri hálfleik, 17:15.
Kolding situr í áttunda sæti og er þremur stigum á undan Ribe-Esbjerg og Fredericia. Tvö síðarnefndu liðin eiga tvo leiki eftir og gætu skotist upp fyrir Kolding gangi allt upp á sama tíma og tógið fari í skrúfuna hjá Kolding í síðasta leik sínum. Kolding mætir botnliðinu, Lemvig, í lokaumferðinni sem fram fer á páskadag.
Ágúst Elí byrjaði ekki leikinn í marki Kolding í kvöld en kom til skjalanna þegar nokkuð var liðið á fyrri hálfleik. Hann varði átta skot sem gerði 33,3% hlutfallsmarkvörslu. Einnig skoraði Hafnfirðingurinn eitt mark.
Óðinn Þór Ríkharðsson skoraði tvö mörk í fimm skotum fyrir Holstebro og átti auk þess eina stoðsendingu.
