Handknattleiksdeild Harðar á Ísafirði hefur frest fram til klukkan 12 á morgun, föstudag, til að skila inn greinargerð vilji deildin bera í bætifláka vegna framkomu forsvarsmanns deildarinnar á leik Vals U og Harðar sem fram fór í Origohöllinni á síðasta föstudag.
Í fundargerði aganefndar segir að borist hafi skýrsla frá dómara vegna framkomu forsvarsmanns Harðar í leik Vals U og Harðar í Grill66 deild karla 15. október. Kemur fram að forsvarsmanninum hafi verið vísað úr húsi af dómara vegna ósæmilegrar framkomu.
Hörður vann leikinn, 29:26, sem Þorleifur Árni Björnsson og Ramunas Mikalonis dæmdu.
Fyrir utan mál forsvarsmanns Harðar var annað erindi tekið fyrir á fundi aganefndar á þriðjudaginn. Sneri það að útilokun Stefáns Hinrikssonar leikmanns Vængja Júpiters í viðureign liðsins við ÍR á síðasta föstudag.
Brot Stefáns þótti ekki þess eðlis að refsa bæri með leikbanni. Athygli Stefáns er vakin „á stighækkandi áhrifum útlokana vegna slíkra brota.“
Lesa má úrskurð aganefndar hér.
