- Auglýsing -
- Auglýsing -
- Auglýsing -

Verðugt verkefni til framfara

Arnar Pétursson, landsliðsþjálfari. Mynd/EPA
- Auglýsing -

„Það verður verðugt verkefni fyrir okkur að mæta frábæru liði Svía. Við hlökkum til leiksins og ætlum að njóta þess að reyna okkur við eitt besta lið heims sem hafnaði í fjórða sæti á Ólympíuleikunum í sumar. Máta okkur við það og taka með okkur heim jákvæða upplifun inn í næsta leik og framhaldið á því starfi sem við erum í saman,“ sagði Arnar Pétursson, landsliðsþjálfari kvenna í handknattleik í samtali við handbolta.is.

Talsverðar breytingar

Í kvöld hefst undankeppni Evrópmóts kvenna í handknattleik hjá íslenska landsliðinu með viðureign við sænska landsliðið í Stiga Sport Arena í Eskilstuna. Vissulega verður ekki ráðist á garðinn þar sem hann er lægstur af hálfu íslenska landsliðsins sem hefur gengið í gegnum talsverðar breytingar á síðustu árum.


Undirbúningur hefur verið stuttur, snarpur og markviss. Arnar leggur áherslu á að leikmenn njóti leiksins, leggi sig fram og stígi skref í átt til framfara. Stutt er í næsta leik í keppninni, gegn Serbum á Ásvöllum á sunnudaginn.

Viljum lengja góðu kaflana

„Okkar markmið er að leggja hjarta og sál í leikinn og uppskera í samræmi við það sem við sáum. Við erum staðráðin í að bæta okkar leik, lengja góðu kaflanum, taka framförum, vera jákvæð og njóta þess að vera í þessari stöðu,“ sagði Arnar sem sagði ekkert launungarmál að sænska lið væri sterkt enda liggja staðreyndir þess fyrir frá keppni á síðustu Ólympíuleikum.


„Sænska liðið getur mikið og margt, bæði í vörn og sókn, Það hefur mörg vopn í sínu búri. Hraðinn er mikill, varnarleikurinn er fjölbreyttur, markverðirnir góður. Heilt yfir mjög heilsteypt og skemmtilegt lið,“ sagði Arnar Pétursson, þjálfari kvennalandsliðsins í stuttu samtali við handbolta.is.


Leikur Svíþjóðar og Íslands hefst klukkan 17. Handbolti.is er í Eskilstuna og fylgist með leiknum í beinni textalýsingu úr keppnishöllinni. Leikurinn verður einnig sýndur á RÚV.

- Auglýsing -
- Auglýsing -
- Auglýsing -
- Auglýsing -
- Auglýsing -
- Auglýsing -