„Ég er klár í slaginn með strákunum. Okkar markmið er að tryggja okkur sigur í riðlinum í þessari landsliðsviku með tveimur sigurleikjum,“ sagði Gísli Þorgeir Kristjánsson landsliðsmaður í handknattleik í samtali við handbolta.is í Brno í gær. Gísli Þorgeir, sem farið hefur á kostum með þýska meistaraliðinu SC Magdeburg í vetur, verður í eldlínunni með félögum sínum í íslenska landsliðinu í kvöld gegn Tékkum í undankeppni EM. Viðureignin fer fram í Brno í Tékklandi og hefst klukkan 19.15.
„Tékkar eru með öfluga leikmenn í flottum liðum um alla Evrópu. Við verðum að vera á okkar besta degi til þess að ná góðum úrslitum. Það er alveg á hreinu. Leikurinn verður erfiður. Ég hef fulla trú á okkur. Við verðum að halda uppi miklum hraða og þora að keyra á þá af fullum krafti,“ sagði Gísli Þorgeir ennfremur.
Svipaðir Ungverjum
Gísli Þorgeir telur Tékka vera með álíka sterkt lið og Ungverjar sem eru íslenskum handknattleikmönnum vel kunnugir eftir nokkra leiki á síðustu árum. Sex ár eru á hinn bóginn liðin frá síðasta landsleik Íslendinga og Tékka.
„Við verðum að vera með einbeitingu á leiknum frá upphafi til enda. Okkar markmið er leika almennilega auk þess að vinna. Undirbúningurinn hefur verið skammur en kosturinn er að við þekkjum vel hvern annan þegar kemur að sóknarleiknum. Einhverjar áherslubreytingar verða á varnarleiknum.
Þetta er í okkar höndum. Við verðum að stíga almennilega upp og sýna að við getum tekist á við alvöru verkefni,“ sagði Gísli Þorgeir Kristjánsson landsliðsmaður í handknattleik í samtali við handbolta.is í Brno í gær.
