- Auglýsing -

„Verðum að vera klárir í hvað sem er“

epa08938022 Rui Silva (R) of Portugal in action against Arnor por Gunnarsson (L) of Iceland during the match between Portugal and Iceland at the 27th Men's Handball World Championship in Cairo, Egypt, 14 January 2021. EPA-EFE/Khaled Elfiqi / POOL

„Alsírbúar leika ekki hinn hefðbundna evrópska handknattleik. Þeir eru svolítið villtir. Við verðum að gíra okkur inn á þá línu frá upphafi,“ segir Arnór Þór Gunnarsson, fyrirliði íslenska landsliðsins í handknattleik, um næsta andstæðing landsliðsins, leikmenn Alsír. Leikur liðanna fer fram í kvöld klukkan 19.30. Leikið verður á sama stað og síðast í New Capital Sports Hall í Kaíró.
Alsír er þegar komið með tvö stig í F-riðli eftir sigur á nágrönnum sínum frá Marokkó á fimmtudaginn, 24:23, þar sem Alsírbúar voru sjö mörkum undir í hálfleik, 15:8. Þeir gáfust hinsvegar ekki upp þótt á móti blési og höfðu sigur að lokum sem var fagnað afar hressilega.


„Varnarleikur Alsírbúa er oft svolítið villtur og þess vegna á að vera auðvelt að mynda yfirtölu í sóknarleiknum. Það er nokkuð sem við verðum að nýta okkur vel,“ sagði Arnór Þór og rifjar upp að síðast þegar lið Íslands og Alsír mættust á HM hafi íslenska liðið lent í miklum vandræðum.

Sex mörkum undir í Katar

„Við vorum 7:1 undir eftir tíu mínútna leik. Okkur tókst að snúa taflinu við en þetta sýnir hvað getur gerst ef menn eru ekki á tánum,“ sagði Arnór Þór en fyrrgreindur leikur sem hann talar um var á HM í Katar fyrir sex árum og lauk með sigri Íslands, 32:24, þrátt fyrir þessa slæmu byrjun.


Alsír tekur nú þátt í HM í fimmtánda sinn, þar af í fyrsta skipti frá árinu 2015. Liðið varð í þriðja sæti í síðustu Afríkukeppni, næst á eftir Egyptalandi og Túnis sem báru höfuð og herðar yfir önnur lið mótsins.
„Þeir geta verið skemmtilega villtir í sínum leik og það er svolítið gaman að horfa á Alsírbúa leika handknattleik. Leikur þeirra er öðruvísi sem verður til þess að útkoman verður stundum sérstök. Þeir fengu til dæmis þrjú eða fjögur rauð spjöld í leiknum við Marokkó,“ segir fyrirliðinn.


„Við eigum möguleika á að nýta hraða okkar í hraðaupphlaupum. Þegar stillt er upp í hefðbundinn sóknarleik þá verðum við að leggja áherslu á að vinna maður gegn manni, fá mann í okkur, klippa, fá yfirtöluna og leita uppi hornamennina. Við megum alls ekki fara á taugum þótt þeir mæti okkur framarlega í þrír, þrír vörn, frekar að vera rólegir og leita lausna. Við verðum að vera klárir í hvað sem er, sex núll vörn, fimm einn, þrjá þrjá vörn eða frönsku vörnina,“ sagði Arnór Þór Gunnarsson, fyrirliði íslenska landsliðsins í samtali við handbolta.is í Kaíró í gær en handbolti.is er ásamt RÚV einu íslensku fjölmiðlarnir sem eru með fréttamenn á vettvangi heimsmeistaramótsins í Egyptalandi.

- Auglýsing -
- Auglýsing -

Nýjustu fréttir

- Auglýsing -