- Auglýsing -

Verður ekkert með Fram á tímabilinu

Karen Knútsdóttir verður ekkert með Fram á keppnistímabilinu sem er nýlega hafið. Mynd/Egill Bjarni Friðjónsson

Karen Knútsdóttir leikur ekkert með Íslands- og deildarmeisturum Fram á keppnistímabilinu sem nýlega er hafið. Karen sagði frá því á samfélagsmiðlum í gærkvöld að snemma á næsta ári fjölgi í fjölskyldu hennar. Hún og Þorgrímur Smári Ólafsson eiga von á öðru barni sínu. Fyrir eiga þau dóttur sem varð tveggja ára í vikunni.


Karen tók ekkert þátt í undirbúningsleikjum Fram áður en flautað var til leiks í Olísdeildinni auk þess sem hún hefur heldur ekkert komið við sögu í fyrstu leikjunum. Eins gaf hún ekki kost á sér í landsliðið sem æfir þessa dagana vegna leikja við ísraelska landsliðið snemma vetrar.


Karen, sem er ein leikreyndasta handknattleikskona landsins, fór á kostum í vor þegar Fram vann ÍBV og síðar Val í úrslitum um Íslandsmeistaratitilinn og var fyrir vikið valin mikilvægasti leikmaður úrslitakeppni Olísdeildar kvenna.

- Auglýsing -
- Auglýsing -

Nýjustu fréttir

- Auglýsing -